सरकारी वकील र प्रहरी अनुसन्धान अधिकृतका लागि आयोजित बाल न्याय सम्बन्धी तीन दिवसीय प्रशिक्षण कार्यक्रम २०७७ चैत्र २६ गते सम्पन्न ।

महान्यायाधिवक्ताको कार्यालय, नेपालको अभियोजन प्रशिक्षण केन्द्रद्वारा २०७७ चैत्र २४ गतेदेखि चैत्र २६ गतेसम्म महान्यायाधिवक्ताको कार्यालय, काठमाडौंमा आयोजित बाल न्याय सम्बन्धी तीन दिवसीय प्रशिक्षण कार्यक्रम सम्पन्न भएको छ ।उक्त प्रशिक्षण कार्यक्रमको उद्घघाटन २०७७ चैत्र २४ गते माननीय महान्यायाधिवक्ता श्री रमेश वडालज्यूले गर्नुभएको थियो ।

माननीय महान्यायाधिवक्ताज्यूले उद्घघाटन समारोहलाई सम्बोधन गर्दै बालबालिका सम्बन्धी मुद्दाको गोपनियता कायम गर्दै अनुसन्धान र अभियोजनमा अपनाउनुपर्ने संवेदनशीलता अपनाई बालमैत्री वातावरण अपनाउन गर्नुपर्ने कार्यहरूका बारेमा सहभागीहरूको तालिमले क्षमतामा विकास गरी पदिय जिम्मेवारी वहन गर्न सघाउ पुर्याउने बताउनुभयो ।अनुसन्धान अधिकृत र सरकारी वकीलबीच मुद्दाको अपनत्व लिर्इ राम्रो ढंगले हुने समन्वय र सहकार्यले मात्र सरकारवादी मुद्दाको सहि तरिकाले अनुसन्धान र अभियोजन भई प्रभावकारी हुनेमा उहाँले जोड दिनुभएको थियो ।

प्रशिक्षण कार्यक्रममा साक्षी संरक्षण, बालबालिका संलग्न मुद्दाको अनुसन्धान प्रकृया, बालबालिका संलग्न मुद्दामा अभियोजन सम्बन्धी ब्यवस्था, मानव बेचबिखन तथा ओसार पसार नियन्त्रण सम्बन्धी कानुनी ब्यवस्था, अपराध पीडितको हक, बाल न्यायको अवधारणा तथा बालबालिका सम्बन्धी ऐन २०७५ मा भएका कानुनी ब्यवस्था र दिशान्तर लगायतका विषयहरूमा प्रस्तुती र छलफल गरिएको थियो ।

प्रशिक्षण कार्यक्रमको स्रोत ब्यक्तिहरूमा नायव महान्यायाधिवक्ता श्री विश्वराज कोइराला, नायव महान्यायाधिवक्ता श्री श्यामकुमार भट्टराई, सहन्यायाधिवक्ता श्री गोपालप्रसाद रिजाल, सहन्यायाधिवक्ता श्री संजीवराज रेग्मी, सहन्यायाधिवक्ता  श्री लोकराज पराजुली, सहन्यायाधिवक्ता श्री खेमराज ज्ञवाली, सहन्यायाधिवक्ता श्री हरिप्रसाद जोशी, प्रहरी वरिष्ठ उपरीक्षक श्री दुर्गा सिंह र अधिवक्ता श्री आशिष अधिकारी रहनुभएको थियो । प्रशिक्षण कार्यक्रमको संयोजन सहन्यायाधिवक्ता श्री गोपालप्रसाद रिजाल, उपन्यायाधिवक्ता श्री प्रकाश गौतम र सहायक न्यायाधिवक्ता श्री शिव वाग्लेले गर्नुभएको गियो ।

दुई समूहमा विभाजन गरी सञ्चालन गरिएको उक्त प्रशिक्षण कार्यक्रममा राजपत्रांकित द्वितीय श्रेणीमा २७ जना सरकारी वकीलहरू र प्रहरी  निरीक्षक र प्रहरी  नायव निरीक्षक ३० जना गरी ५७ जनाको सहभागीता रहेको थियो ।  

संलग्न जोडिएका विवरणहरु