नायब महान्यायाधिवक्ता श्री विश्वराज कोइरालाज्यूबाट कारागार कार्यालय, झापालाई २०७७ पुस २३ गते पुस्तक हस्तान्तरण ।

महान्यायाधिवक्ताको कार्यालय र जिल्ला सरकारी वकील कार्यालय, झापाको संयुक्त आयोजनामा कारागार कार्यालय, झापालाई २०७७ पुस २३ गते कैदीबन्दीलाई अध्ययन गर्नका लागि पुस्तक हस्तान्तरण गरिएको छ ।

कारागार कार्यालय, झापाको परिसरमा आयोजित कार्यक्रममा महान्यायाधिवक्ताको कार्यालयका नायब महान्यायाधिवक्ता श्री विश्वराज कोइरालाज्यूले कारागार कार्यालय, झापाका प्रमुख श्री राजेन्द्र गौतमज्यूलाई पुस्तक हस्तान्तरण गर्नुभयो ।  

नेपालको संविधान, ऐन, नियमका संग्रह लगायतका साहित्य, इतिहास सहित अन्य पठनीय सामाग्रीहरू कैदी बन्दीलाई अध्ययन गर्नका लागि हस्तान्तरण गरिएको हो । 

कार्यक्रमका प्रमुख अतिथि नायब महान्यायाधिवक्ता श्री विश्वराज कोइरालाज्यूले महान्यायाधिवक्ताको कार्यालयले संस्थागत सुधार मार्फत न्यायमा पहुँच परियोजनासँगको सहकार्यमा आठ वटा कारागारहरूका लागि पुस्तक खरिद गरी हस्तान्तरण गर्ने कार्यको थालनी गरेको जानकारी दिंदै कारागारमा पुस्तकालयको विकासले कैदीवन्दीहरूलाई अध्ययन गर्न प्रेरित गरी सकारात्मक उर्जा विकास हुने विश्वास व्यक्त गर्नुभयो ।

उहाँले भन्नुभयो, ×सजाय सम्वन्धि नयाँ र सुधारात्मक व्यवस्थाको कार्यान्वयन तथा कारागारको अनुगमन र सुधारमा महान्यायाधिवक्ताको कार्यालयले कारागार अनुगमन गरी सम्बन्धित निकायलाई निर्देशन, सुझाव र प्रतिवदेन दिने गरेको छ ।"

जिल्ला सरकारी वकील कार्यालय, झापाका जिल्ला न्यायाधिवक्ता श्री पदमप्रसाद वस्तीज्यूले कारागार सुधारमा सबै सरोकारवालाहरुको भूमिका महत्वपूर्ण हुने उल्लेख गर्दै कारागारको सुधार र समाजमा कैदीवन्दीहरूको पुर्नस्थापना गर्न सबै सरोकारवालाहरूले सामूहिक रूपमा  कार्य गर्नुपर्ने बताउनुभयो ।

झापा जिल्लाका प्रमुख जिल्ला अधिकारी श्री श्रवण कुमार तिमिल्सिनाज्यू र जिल्ला प्रहरी कार्यालय, झापाका प्रमुख प्रहरी उपरीक्षक श्री कृष्ण कोइरालाज्यूले हस्तान्तरण गरिएको पुस्तकको अध्ययनले कैदीवन्दीको ज्ञानको दायरा बढाउन मद्दत गर्नुका साथै सकारात्मक परिवर्तन ल्याउन भूमिका खेल्नेमा जोड दिनुभयो ।

कार्यक्रममा सशस्त्र प्रहरी उपरीक्षक श्री रमेश पाण्डेज्यू र अनुसन्धान उपनिर्देशक श्री तिलक प्रसाईज्यूको पनि उपस्थिति रहेको थियो ।

जिल्ला सरकारी वकील कार्यालय, झापाका जिल्ला न्यायाधिवक्ता श्री पदमप्रसाद वस्तीज्यूको अध्यक्षतामा भएको कार्यक्रमको सञ्चालन महान्यायाधिवक्ताको कार्यालयका सहायक न्यायाधिवक्ता श्री प्रभात क्षेत्रीले गर्नुभएको थियो ।

संलग्न जोडिएका विवरणहरु