मिति २०८१।१०।२९ गते बाँकेको राप्तीसोनारी गाउँपालिकामा बाल अधिकार संरक्षण विषयमा समुदायमा सरकारी वकील कार्यक्रम सम्पन्न

बाँकेको राप्तीसोनारी गाउँपालिकामा बाल अधिकार संरक्षण विषयमा समुदायमा सरकारी वकील कार्यक्रम सम्पन्न

उच्च सरकारी वकील कार्यालय नेपालगंजको आयोजना र राप्तीसोनारी गाउँपालिका, बाँकेको समन्वयमा समुदायमा सरकारी वकील कार्यक्रम अन्तर्गत बाल अधिकार संरक्षण सम्बन्धि अन्तरक्रिया कार्यक्रम मिति २०८१ साल माघ २९ गते राप्तीसोनारी गाउँपालिकाको सभाहलमा सम्पन्न भएको छ ।

उक्त कार्यक्रममा सहभागीहरुलार्इ सरकारी वकीलको परिचय, सरकारवादी मुद्दाहरू र समुदायबाट गरिएको अपेक्षा र बाल अधिकार संरक्षणमा स्थानीय तहको भूमिका विषयमा उच्च सरकारी वकील कार्यालय नेपालगंजका उपन्यायाधिवक्ता नगेन्द्र लम्सालले कार्यपत्र प्रस्तुत गरी जानकारी गराउनुभएको थियो ।

यसैगरी कार्यक्रममा र्इलाका प्रहरी कार्यालय कोहलपुरका प्रहरी निरीक्षक रेशमलाल पौडेलले अपराध नियन्त्रण र अनुसन्धान विषयमा कार्यपत्र प्रस्तुत गरी जानकारी गराउनुभएको थियो ।

कार्यक्रममा समुदायका व्यक्तिहरुले उठाएका जिज्ञाशाहरुको जवाफ दिदै उच्च सरकारी वकील कार्यालय नेपालगंजका सहन्यायाधिवक्ता अशोकराज रेग्मीले सभ्य समाज निर्माणका लागि अपराध न्यूनीकरण हुनुपर्ने र यसका लागि समुदायका सबै क्षेत्रका मानिसहरु क्रियाशील हुनुपर्नेमा जोड दिनुभयो ।

उहाँले पीडित व्यक्तिले आफू अपराधबाट पीडित भएमा त्यसको जानकारी प्रहरी कहाँ निवेदन र जाहेरी लिएर जानुका साथै परिवार र समाजले समेत दोषीलार्इ कारबाही गर्नमा प्रहरीलार्इ सहयोग गर्नुपर्नेमा जोड दिनुभयो ।

कार्यक्रमका प्रमुख अतिथि राप्ती सोनारी गाउँपालिकाका अध्यक्ष तप्तबहादुर पौडेलले कानूनको बारेमा समुदायलार्इ सचेत गराउन कानूनी सचेतना कार्यक्रम पालिकामा कानूनी साक्षरता अभियानको रुपमा सञ्चालन गर्न जरुरी देखिएकोले यसमा सरोकारवालाहरुसँग समन्वय गरी कार्यक्रम निर्धारण गरी सञ्चालन गर्ने बताउनुभयो ।

उहाँले बालविवाह र आर्थिक अपराधहरुसँगै विभिन्न किसिमका अपराधहरु मानिसहरुको मानसिकताको कारणले समेत सिर्जना हुने भएकाले समाजका अगुवा वरघर र टोल विकासका अगुवाले समुदायलार्इ जिम्मेवार र अनुशासित बनाउने तथा स्वयं व्यक्ति आत्म अनुशासित भएमा अपराध न्यूनीकरणमा मद्दत पुग्ने उल्लेख गर्नुभयो ।

राप्ती सोनारी गाउँपालिकाका अध्यक्ष पौडेलले भन्नुभयो "बालबालिकालार्इ नैतिक शिक्षा प्रदान गरेर नैतिकवान बनाएमा सभ्य समाज निर्माण गर्नमा सघाउ पुग्नुका साथै अभिभावकले आफ्ना बालबालिकाको क्रियाकलापहरु बारेमा जानकारी लिने तथा लागू औषध दुर्व्यसन र मादक पदार्थ सेवन जस्ता कार्यबाट जोगाउनुपर्छ ।"  

कार्यक्रमका विशेष अतिथि राप्ती सोनारी गाउँपालिकाका उपाध्यक्ष श्री मनीषा सिंह थारुले बालविवाह र यौन हिंसा जस्ता अपराध न्यूनीकरणका लागि आफू बस्ने टोलबाट नै टोलका अगुवाहरु क्रियाशील भएर यसको रोकथाम, कानूनी दायरामा ल्याउन  र सचेतनाका लागि क्रियाशील हुनुपर्नेमा जोड दिनुभयो ।

उहाँले पालिकामा थारु समुदायको बाहुल्यता भएका बस्तीहरु धेरै भएकाले थारु अगुवा वरघरहरुलार्इ बाल विवाह निरुत्साहित गर्न र लैङ्गिक हिंसाको रोकथामका लागि क्रियाशील बनाउन जरुरी देखिएको बताउनुभयो ।

उपाध्यक्ष चौधरीले सरकारवादी फौजदारी मुद्दाको बारेमा जानकारी प्रदान गर्न र बाल अधिकार संरक्षणमा पालिकाको भूमिकाको बारेमा जनप्रतिनिधि लगायत कार्यक्रममा उपस्थित समुदायलार्इ सचेतना वृद्धि गरेको बताउनुभयो । 

जिल्ला कानूनी सहायता समिति बाँकेका कानूनी सहायता अधिकृत मानबहादुर बुढाले कुनै पनि नागरिक न्यायको हकबाट बञ्चित नहुन भन्नका लागि असमर्थ पक्षलार्इ सहयोग गर्न सरकारले जिल्ला कानूनी सहायता समिति गठन गरेकाले आर्थिक रुपले कमजोर कानून व्यवसायी राख्न नसक्ने असमर्थ पक्षहरुलार्इ कानूनी सहायता समितिले निशुल्क रुपमा कानूनी सहायता प्रदान गरिरहेकोले पालिकाको वडा कार्यालयले सम्बन्धित व्यक्तिलार्इ कानूनी सहायता प्रदान गर्नका लागि समितिमा पत्राचार गरेमा निशुल्क कानूनी सहायता प्रदान गरिने बताउनुभयो ।

उक्त कार्यक्रमको सञ्चालन र सहजिकरण उच्च सरकारी वकील कार्यालय नेपालगंजका  उपन्यायाधिवक्ता नगेन्द्र लम्सालले गर्नुभएको थियो ।

उक्त कार्यक्रम उच्च सरकारी वकील कार्यालय नेपालगंजका सहन्यायाधिवक्ता अशोकराज रेग्मीको अध्यक्षता सम्पन्न भएको थियो ।

कार्यक्रममा सरकारी वकील, जनप्रतिनिधि, प्रहरी, कानून व्यवसायी, कर्मचारी, विद्यार्थी, सञ्चारकर्मी, समुदायका अगुवा वरघर र आमा समूह सहित समूदायका विभिन्न क्षेत्रका सहभागीहरु गरी ५७ जनाको सहभागीता रहेको थियो ।

संलग्न जोडिएका विवरणहरु