खुङ्ग्रीमा समुदायमा सरकारी वकील कार्यक्रम

जिल्ला सरकारी वकील कार्यालय रोल्पा र जिल्ला प्रहरी कार्यालय रोल्पाको सहकार्यमा मिति २०७७ माघ १६ गते शुक्रवार सुनीलस्मृती गाउँपालिका वडा नं. २ खुङ्ग्रीमा समुदायमा सरकारी वकील र समुदाय-प्रहरी साझेदारी संयुक्त कार्यक्रम सम्पन्न गरिएको छ ।

महान्यायाधिवक्ताको कार्यालयको दोस्रो पञ्चवर्षीय रणनीतिक योजनाले प्रक्षेपण गरेबमोजिम जिल्ला सरकारी वकील कार्यालय रोल्पाको वार्षिक कार्ययोजना अनुरुप पीडितको वकीलका रूपमा सरकारी वकीलको जिम्मेवारी, सरकार वादी हुने मुद्दाको कारवाही प्रक्रिया एवम् समुदायको भूमिका र जिम्मेवारी समेतका बारेमा जानकारी गराउने उद्देश्यले कार्यक्रमको आयोजना गरिएको हो ।

कार्यक्रममा सरकार वादी फौजदारी मुद्दाको अनुसन्धान, अभियोजन र प्रतिरक्षामा सरकारी वकीलको भूमिका तथा समुदायसँगको अपेक्षा विषयमा कार्यपत्र प्रस्तुत गर्दै निमित्त जिल्ला न्यायाधिवक्ता नुमराज खनाल शर्माले अपराधको सूचना दर्तादेखि न्याय सम्पादनका फरक फरक चरणहरूका बारेमा जानकारी गराउनुभएको थियो । फौजदारी न्याय प्रणालीमा संलग्न हुने मुख्य तीन अङ्गहरू अनुसन्धानकर्ता प्रहरी, अभियोजनकर्ता सरकारी वकील र न्यायालयको आ-आफ्नै भूमिका र जिम्मेवारी कानूनले प्रदान गरेको जानकारी गराउँदै अपराधको सूचना दर्ता, अनुसन्धानका विभिन्न चरहणहरूमा र प्रमाण परीक्षणदेखि फैसला कार्यान्वयनसम्म समुदायको अहम् भूमिका र जिम्मेवारी रहने उल्लेख गर्नुभएको थियो ।

त्यस्तै रोल्पा जिल्लामा अपराध अनुसन्धानको अवस्था एवम् प्रहरीको भूमिका विषयमा कार्यपत्र प्रस्तुत गर्दै प्रहरी निरीक्षक सन्तोषकुमार के.सी. रोल्पा जिल्लामा अपराध अनुसन्धानको सचित्र तथ्याङ्क प्रस्तुत गर्दै अपराध रोकथाम र न्यूनीकरणमा समुदाय, अभिभावक र बालबालिकाले ध्यान दिनुपर्ने विषयहरूका बारेमा समेत जानकारी गराउनुभएको थियो ।

कार्यक्रमलाई सम्बोधन गर्दै रोल्पा जिल्ला अदालतका स्रेस्तेदार प्रेम खड्काले न्याय र कानूनको अन्तिम उद्देश्य जनतालाई सेवा दिनु हुने बताउँदै कानूनको कार्यान्वयनमा सबै पक्षको उत्तिकै भूमिका र जिम्मेवारी रहने जानकारी गराउनुभयो । सहभागीहरूका जिज्ञासाको सम्बोधन गर्दै उहाँले न्यायिक कारवाही र अदालती कार्यविधिका बारेमा समेत जानकारी गराउनुभएको थियो ।

कार्यक्रममा नन्दु गिरी, वर्षा परियार, जीवलाल भूसाल, पूनमसिंह ठकुरी, पुनरसिंह मरम्खामी, कल्पना वि.क. लगायतले विभिन्न कानून न्यायका बारेमा विभिन्न जिज्ञासाहरू राख्नुभएको थियो ।

सुनीलस्मृती गाउँपालिका वडा नं. २ का वडाध्यक्ष नेत्रबहादुर गिरीको अध्यक्षतामा सम्पन्न कार्यक्रममा स्वागत तथा विषय प्रवेश जिल्ला सरकारी वकील कार्यालयका नायब सुब्बा उमापती गैरे र सञ्चालन प्रहरी जवान घनश्याम बुढाथोकीले गर्नुभएको थियो । स्थानीय तहका जनप्रतिनिधि, आमा समूह, सामाजिक अगुवा, विद्यार्थी सेमत ७० जनाको सहभागिता रहेको उक्त कार्यक्रम खुङ्ग्रीस्थित चतुर्भुज महिला बहुउद्देश्यीय सहकारी संस्थाको हलमा सम्पन्न भएको थियो ।

संलग्न जोडिएका विवरणहरु