न्याय प्रशासन ऐन, २०७३ दफा ३ मा प्रत्येक जिल्लामा एउटा जिल्ला अदालत रहने व्यवस्था छ । जिल्ला अदालतको मुकाम रहेको स्थानमा जिल्ला सरकारी वकील कार्यालय रहने व्यवस्था सरकारी वकील नियमावली, २०५५ को नियम ४ को उपनियम ४ मा गरिएको छ । सो अनुरुप जिल्ला अदालतहरू रहेका स्थानमा जिल्ला सरकारी वकील कार्यालयहरूको स्थापना भई कार्यसम्पादन हुँदै आएको छ । नेपाल सरकार वादी हुने फौजदारी तथा देवानी मुद्दाहरू चलाउने नचलाउने सम्बन्धी निर्णय गर्ने सम्वन्धित अड्डा अदालतमा मुद्दा दायर गर्ने नेपाल सरकार वादी भइ चल्ने मुद्दामा नेपाल सरकारको तर्फवाट प्रतिरक्षा गर्ने, जिल्ला स्थित संघीय सरकार अन्तर्गतका सरकारी कार्यालयहरूलाई कानुनी राय प्रदान गर्ने, जिल्ला अदालतमा पुनरावेदन लाग्ने नेपाल सरकार वादी हुने मुद्दामा पुनरावेदन सम्वन्धी कार्य गर्ने आदि कार्यहरू जिल्ला सरकारी वकील कार्यालयमा कार्यरत जिल्ला न्यायाधिवक्ता तथा सहायक जिल्ला न्यायाधिवक्ताहरूवाट हुदै आएको छ ।

प्रदेश नं. २ अन्तर्गत जिल्ला सर्लाही जिल्ला मलगंवा न.पा. वडा नं. १० अवस्थित यस कार्यालयमा नेपाल न्याय सेवा सरकारी वकील समूहका राजपत्रांकित द्वितीय श्रेणीका जिल्ला न्यायाधिवक्ताले कार्यालयको प्रमुखको रुपमा कार्य गर्दछन् । यस कार्यालयमा राजपत्रांकित तृतीय श्रेणीका दुई जना सहायक जिल्ला न्यायधिवक्ता, रा.प.अनं. प्रथम श्रेणीका चार जना, रा.प.अनं. द्वितीय श्रेणीका दुई जना र अन्य सहायक कर्मचारीहरूले सेवा प्रवाह गरिरहेको अवस्था छ ।

जिल्लाकाे संक्षिप्त परिचय :

सर्लाही जिल्लाको नामाकरण हेमपुर गाउँ विकास समितिमा रहेको "सर्लाही देवीको मन्दिर" बाट रहेको हो भन्ने स्थानीय बासीन्दाहरुको धारणा रहेको पाइन्छ। सर्लाही जिल्ला मध्यमाञ्चल विकास क्षेत्रको जनकपुर अञ्चलमा पर्दछ। यस जिल्लाको सदरमुकाम मलंगवा नगरपालिका हो । २६ डि. ४५ मि. देखि २७ डि. १० मि. उत्तरी अक्षांश र ८५ डि. २० मि. देखि ८५ डि. ५० मि. पूर्वी देशान्तरसम्म फैलिएको सर्लाही जिल्लाको सिमानामा पूर्वमा महोत्तरी जिल्ला पर्दछ, पश्चिममा रौतहट जिल्ला, उत्तरमा सिन्धुली जिल्ला पर्दछ भने दक्षिणमा भारतको विहार प्रान्त पर्दछ । यस जिल्लाको क्षेत्रफल १२५९ बर्ग कि. मि रहेको छ र २०६८ को जनगनणा अनुसार ७,६९,७२९ जनसंख्या रहेको छ। यस जिल्लामा ५ नगरपालिका र ८४ गाविस रहेका छन् । यस जिल्लाको प्रमुख उत्पादनमा तरकारी, उखु , आँप र माछा पर्दछन् । यस जिल्लाको प्रमुख भाषामा बजिका (ठेटी), मैथली र नेपाली हुन् र सर्लाहीको प्रमुख बाहुल्य जातीमा क्रमिकरूपमा यादव , कुशवाहा-कोइरि, मुस्लिम, तेली र तामाङ पर्दछन् । २०६८ को जनगनणा अनुसार यस जिल्लाको प्रमुख धर्ममा हिन्दु धर्म ( ८५ %) रहेको छ, र त्यस पछि मुसलवान ( ८% ) र बोद्ध ( ५.७१% ) ।