जिल्ला सरकारी वकील कार्यालय महोत्तरी, जलेश्वर नगरपालिका वडा नं. २ मा अवस्थित छ । यो कार्यालय ३ कठ्ठा १८ धुर क्षेत्रफलमा फैलिएको छ ।

हाल देशै भरी जिल्ला सरकारी वकील कार्यालयहरूको संख्या ७७ रहेको छ, ति मध्ये जिल्ला सरकारी वकील कार्यालय महोत्तरी पनि एक हो । यस कार्यालयहरूको नेतृत्व नेपाल न्यायसेवाका राजपत्राङ्कित द्वितिय श्रेणीका अधिकृत (जिल्ला न्यायाधिवक्ता) बाट गरिंदै आएको छ । यस कार्यालयमा सहायक जिल्ला न्यायाधिवक्ताबाट सरकारी वकीलको रूपमा कार्य सम्पादन गरिन्छ भने अन्य सहायक स्तरका कर्मचारीहरू समेत रहन्छन ।

संविधानमा लेखिएदेखि बाहेक कुनै अदालत वा न्यायिक अधिकारी समक्ष नेपाल सरकारको तर्फबाट मुद्दा चलाउने वा नचलाउने भन्ने कुराको अन्तिम निर्णय गर्ने र नेपाल सरकारको तर्फबाट चलाइने मुद्दाहरूको सन्दर्भमा सम्बन्धित अदालत वा न्यायिक अधिकारी समक्ष अभियोगपत्र वा फिरादपत्र दर्ता गर्ने, मुद्दाको बहस पैरवी र प्रतिरक्षा गर्ने एवं सरकार वा सरकारले तोकेका अधिकारीलाई कानूनी राय प्रदान गर्ने लगायतका काम, कर्तव्य र अधिकार महान्यायाधिवक्तामा निहित रहेको छ । महान्यायाधिवक्तामा निहित अधिकारहरू मातहतका सरकारी वकीलहरूलाई सुम्पन सक्ने संवैधानिक व्यवस्था अनुसार महान्यायाधिवक्ताबाट प्रत्यायोजित अधिकार महान्यायाधिवक्ताको कार्यालयको मातहतको यस जिल्ला सरकारी वकील कार्यालयमा कार्यरत सरकारी वकीलबाट प्रयोग हुदै आएको छ ।